لأن من بين 59.19 مليون مستخدم للإنترنت في مصر في حوالي 49 مليون مستخدم لقنوات التواصل الاجتماعي المختلفة، بيقضوا متوسط 3 ساعات يوميًا على مواقع زي الـ Facebook والـ Instagram و Twitter؛ ومع ازدياد عدد المستخدمين بالملايين كل سنة عن اللي قبلها أصبح ضروري إنك كصاحب بزنس إنك تسوق لمنتجاتك أو الخدمات اللي بتقدمها من خلال قنوات التواصل الاجتماعي المناسبة لمجالك واللي تقدر توصل من خلالها للشريحة المناسبة من جمهورك.

بالرغم من إن المنافسة على التسويق من خلال الـ social media أصبحت عبارة عن معركة شرسة مع منافسين أقوياء متخصصين في مجالات مختلفة، إلا إننا لاحظنا خلال الـ 10 سنين الأخيرة ظهور مشاريع صغيرة قدرت خلال فترة قصيرة إنها تنافس بقوة براندات كبيرة موجودة في مصر وحول العالم؛ وده كان بفضل اتباعهم لاستراتيجيات تسويقية اعتمدت على بعض العوامل اللي قدرت في النهاية تحقق لها النجاح المطلوب وسط باقي المنافسين.

في بعض العوامل بتعتمد عليك كصاحب بزنس زي إنك تكون محدد هدفك ورؤيتك المستقبلية للمشروع، وإن مشروعك يكون بيلبي احتياجات أو بيحل مشاكل معينة بتواجه الناس، وضروري طبعًا إنك تكون محدد ميزانية للتسويق ومُعتمد عليه كعمود مهم من العواميد اللي بيرتكز عليها مشروعك.
في عوامل تانية بتعتمد على وجود متخصص في التسويق يقدر يساعدك في دراسة السوق، وتحليل المنافسين، وتحليل جمهورك المستهدف، وتحديد نقاط القوة ونقاط الضعف لمشروعك، وتحديد ميزانية التسويق، وغيرهم من النقاط اللي يقدر بيها في النهاية ينفذ لك استراتيجية متفصلة مخصوص لمشروعك علشان يضمن لك تحقيق النجاح المطلوب، والوصول لأكبر عدد ممكن من الشريحة المُستهدفة.

ميزانية التسويق بتختلف من مشروع للتاني، فلو مثلًا هتسوق لمطعم غير لما تسوق لفندق، وغير لما تسوق لمحل ملابس، وغير التسويق الشخصي. كمان بيعتمد على منصات الـ social media اللي هتسوق من خلالها لخدماتك، فمثلًا تكلفة التسويق من خلال الـ Facebook بتختلف عن تكلفة التسويق من خلال موقع Twitter وتُعتبر تكلفة الإعلانات على الـ Facebook أقل بنسبة 36.67% عن تكلفة الإعلانات من خلال Twitter؛ لكن طبعًا كل منصة منهم ليها وظيفتها وليها جمهورها اللي تقدر تحدد من خلال تحليل الجمهور المستهدف إذا كان الجمهور ده هو المناسب لتسويق خدمتك أو منتجك لِه ولا لأ.